Kiko ta outismo?

Outismo ta un desórden den e prosesamentu di informashon den e selebro. Hende ku outismo tin un manera diferente di prosesá informashon ku ta yega via di e 5 sentidonan bista, holó, sinti, oido, smak. Nan tin difikultat pa prosesá e tantu detayenan ku nan ta eksperensha den un totalidat koherente. Komo resultado e persona ku outismo tin problema ku komunikashon, interakshon soshal i imaginashon.

Outismo ta un hèndikèp pa bida largu, hopi biaha invisibel, ku tin influensia riba e diferente área i etapa di bida. E hende ku outismo tin áreanan spesífiko ku e ta hopi fuerte òf debil den dje. Serka kada persona esaki ta manifestá na un forma diferente i den kombinashon úniko. P’esei ta papia di ‘outismo spectrum’. Kada persona ku outismo mester di su propio “manual di guia” i aserkamentu. Loke ta funshoná pa esun no nesesariamente ta adekuá pa un otro tambe.

Mayoria hende ku outismo mester di guia profeshonal hinter nan bida, un mas ku otro. Si tin komprenshon den e komunidat i ku guia korekto hopi hende ku outismo por bai skol regular, traha i mantené amistat / relashon ku otronan. Di e manera aki tambe por tin un ròl signifikante i balioso den nos komunidat.

Outismo ta afektá hende di tur edat i tur nivel di inteligensia.

Mundialmente e insidensia di outismo ta afektá 1 den kada 91 persona. Na Kòrsou ta kalkulá ku mester tin mas ku 1000 hende ku outismo.

Pues e chèns ta hopi grandi ku un persona serka òf konosí di bo tin outismo, den bo famia, bo amigunan, bo amistatnan, na skol òf trabou.

Kiko hasi?

Si bo ta nota ku e desaroyo di bo yu ta diferente for di un mucha di su edat i e ta kuadra ku e diferente di e karakterístikanan menshoná ta bon pa konsulta ku su dòkter.

Tin diferente terapia disponibel ku por yuda un mucha ku outismo. Pa e motibu ei ta importante pa detektá outismo tempran. Mas tempran diagnostiká outismo mas lihé i mihó por yuda e mucha.

AAC ta yuda den dunamentu di informashon i sosten na mayornan.

Kon bo ta rekonose Autismo?

E karakterístikanan ku ta sigui por ta presente seka personanan ku autismo. E pèrsona ku autismo por tin un kombinashon di diferente karakterístika i sierto di nan por ta mas severo ku otro.

  • e ta evitá di wak hende den kara.
  • e no gusta pa karisi’é.
  • e no ta reakshoná riba stèm pero si riba zonido di papel.
  • e ta fasiná pa ophetonan ku ta drai rònt
  • e tin interes eksagerá i detayá pa sierto tópiko p.e. avion, bestia, boto
  • e ta protesta fuerte kontra kambio di rutina inesperá.
  • e ta pega su mes di un manera eksagerá na un opheto.
  • e ta keda hunga e mesun wega òf hasi e mes un moveshon den e  wega pa basta ratu.
  • e ta ripití palabra òf frase ku un hende papia kuné.
  • e tin difikultat ku atendé ku otro hende/mucha.
  • e no tin masha noshon di peliger.
  • e no ta papia.
  • e ta preferá hunga su so.

Comments are closed